18. юна 2010 на великій сценї Театру Александра Духновіча в Пряшові быв 11. річник конкурзу з міджінароднов участёв у декламації поезії, прозы, властной творчости, народного і біблічного росподіданя і малых сценїчных форм у русиньскім языку – Духновічів Пряшів.

Дообідя ся зачало святочным отворїнём конкурзу председом Русиньской оброды на Словеньску, Володиміром Противняком. А потім уж проходив самотный конкурз, котрый быв збогаченый културным проґрамом в інтерпретації Крістіана Гуняры зо Стащіньской Розтокы, якый ся презентовав модерныма русиньскыма співанками.
Дале была павза на обід, котра з єдной годины ся продовжыла о далшу півтора годину, также главно малым декламаторам уж было барз тяжко вытримати. По перерві оцїнїня того річника конкурзу зробив председа пороты, проф. ПгДр. Осиф Сіпко, ПгД., якый дав молодым декламаторам много цінных рад, але наконець высоко оцїнив тот факт, же така акція ся орґанізує, а то за богатой участи молодых декламаторїв. Наслїдно В. Противняк і О. Сіпко передавали діпломы і дарункы найлїпшым декламаторам, з котрых ся хоче спомянуты холем тых, што здобыли першы місця (0. катеґорія – поезія: Максім Сійка з МШ на ул Духновіча в Міджілабірцях, 1. кат. – поезія: Зузана Ґайдошова з ОШ у Пчолинім, 1. кат. – проза: Славка Ковачова з ОШ у Пчолиннім, 1. катеґорія – властна творчіть: Патрік Яночко з ОШ в Ублї, 2. кат. – поезія: Оксана Росул із Русиньской недільной школы у Велкикім Березнім (дістала і міморядну цїну за декламаторьскый прояв, тым і можность перебываня у тыжденный лїтнїм таборї про русиньскы дїти в Дрєніцї-Лысій), 2. кат. – проза: Крістіїна Пелёва з ОШ у Стащінї (дістала і Цїну Матіцї словеньской а стала ся і Лавреатков Духновічого Пряшова 2010 міджі дїтми), 2. кат. – малы сценїчны формы: Матуш Оцетник із ОШ у Кленовій, 2. кат. – народне росповіданя: Еріка Лабашова з ОШ у Шарішскім Ястрабю, 3. кат. – поезія: Івета Ігнаткова з ОШ в Ублї, 3. кат. – проза: Владислава Леснякова з ОШ у Шар. Щавнику, 5. кат. – властна творчость: Миколай Коневал із Камюнкы. Того року были выбраны аж двоє Лавреатів Духновічого Пряшова – уж спомянута К. Пелёва і Мґр. Анна Мігалёвова, бывша учітелька русиньского языка ОШ на ул. Коменьского в Міджілабірцях, яка была оцїнена за поринос в области навчаня русиньского языка і цїлковой приправы дїтей на вшыткы річникы Духновічого Пряшова.

Першыраз пройшов выбір найпопуларнїшого русиньского писателя на Словеньску посередництвом тайного голосованя декламаторїв, шмарїнём выповненого листка до урны. Так 3. місце здобыв Штефан Смолей із Міджілаборець, 2. місце Штефан Сухый із Стащіна а 1. місце Осиф Кудзей із Няґова, якы тыж были оцїнены діпломами і дарунками. Ґратулуєме вшыткым вїтязам і оцїненым.
Конкурз модеровали: молодый герець русиньского Театру А. Духновіча, Михал Ільканин і редакторка русиньского тіму Словеньского розгласу в Кошіцях, Сілвія Зелінкова. Орґанізатором конкурзу была Русиньска оброда на Словенську в сполупраці з містом Пряшів, Пряшівскым самосправным краём і Крайскым школьскым урядом у Пряшові. Акція была реалізована із фінанчнов підпоров Міністерства културы СР – проґрам Култура народностных меншын 2010.