12. юн буде Днём Русинів на Словеньску. Так вырїшыли векшынов голосів чітателї InfoРусина і Народных новинок, як і нашой вебовой сторінкы www.rusynacademy.sk . Тот день ся вяже з датумом 12. 6. 1848, коли ся одбыв першый Славяньскый зязд у Празї, на котрім взыв участь і Й. М. Гурбан і предложыв меморандум. В нім ся першыраз пожадовало узнаня Словаків і Русинів як свойбытных народів, чім ся зачало народне оброджіня Словаків і Русинів у Австро-Угорьску. Вяже ся тыж із датумом 12. 6. 1933, коли в рамках Днїв русиньской културы (10. – 12. 6.) быв одгаленый у Пряшові памятник народному будителёви Русинів – Александрови Духновічови. Установлїнём того свята Русинів сповнив ся пункт узнесїня зо засїданя Світовой рады Русинів, котрый ся тыкав двох членьскых орґанізацій Світового конґресу Русинів – Русиньской оброды на Словакії і Словенськой асоціації русиньскых орґанізацій. Тот день ся першый раз буде славити на будучій рік.