30. марца 2011 Інштітут русиньского языка і културы Пряшівской універзіты в Пряшові в засїдалнї єй Ректорату зреалізовав уж другый тогорічный научный семінарь карпаторусиністікы (од зачатку орґанізованя проєкту, од року 2009, то быв уж 14. научный семінарь а проходив у третїм річнику), а то на актуалну в тот час тему: Політічны партії в народнім русї карпатьскых Русинів, із котров выступив ПгДр. Станїслав Конєчні, к. н. із Сполоченьсконаучного інштітуту Словеньксой академії наук у Кошіцях.(Інтервю з тым научным працовником буде опублікованe в Русинї 2/2011).
Научны семінарї карпаторусиністікы мають своїх стабілных навщівників. Дакотры з них сі выберають конкретны темы з істых областей жывота Русинів, іншы приходять на каждый семінарь. Самособов, міра навщівности залежить і од особы выступаючого, од ёго способности здобыти приязень слухачів, од способу, якым докаже подати тему. Кандідат історічных наук Станїслав Конєчні є такым професіоналом, котрый і наперек высокому, прісно научному штілу, в котрім робить свої рефераты, докаже дану тему передати простым, некомплікованым штілом, также ёго выступы ся все тїшать популарности. Заєдно треба сконштатовати, же народностным меншынам (в першім рядї Русинам) ся у своїм професіоналнім жывотї занимать скоро 30 років, што ґарантує солідный перегляд із даной проблематікы.
З высше спомянутых причін семінарь з доктором Конєчным быв інтересный і богатый на діскусію, принїс много новых знань тым, котры на нїм взяли участь.