Дня 21. фебруара 2012 ся в засїдалнї деканкы ФГПВ ПУ одбыв 18. Научный семінар карпаторусиністікы орґанізованый Інштітутом русиньского языка і културы. Быв то першый семінар орґанізованый в року 2012.
Темов семінара были Резултаты етнічного руху Лемків у Польщі на зачатку ХХІ. стороча. Реферат сі приправила вызначна лемківска особность Др. Олена Дуць-Файфер з Інштітуту выходославяньской філолоґії Яґелоньской універзіты в Кракові, котру на зачатку семінара привітала і представила ПгДр. Кветослава Копорова. Реферуюча привлижыла історічны впливы на сучасный став Лемків, якы розлічны сітуації і скуточности овливнили тоты резултаты.
Лемкы не мають свою політічну партію, котра бы їх заступляла у владї а ани не мають достаток сил на єй створїня. Але мають много сполків, што ,ож обдивляти, кідь береме до увагы факт, як суть Лемкы в Польску розметаны на вшыткы бокы. Но і так доказали выбудовати функчны сполкы і орґанізації, котры суть актівныма при захованю і далшому розвитку лемківской културы. Міцно інтересна тема, о котрій бы ся дало довго бісїдовати, но на жаль быв семінар часово обмеженый. Самособов участници семінара дістали простор на вопросы а потім, як традічно, наслїдовала презентація найновішых русиньскых публікацій. Представлены были нелем публікації выданы на Словеньску (як Літературный алманах, Мої сны од Юрка Харитуна і д.), але Др. Олена Дуць-Файфер принесла представити і лемківскы найновішы выданя як научны публікації, так і публікації красной літературы. Про штудентів – русиністів была участь на семінару хосенна іщі з єдного доводу. Мали можность спознати вызначну особность лемківского русиньского руху і высокошкольску учітельку – русиністку. На основі того прямого контакту можуть лїпше вырішыти свій далшый розвиток в области карпаторусиністікы, наприклад єдносеместралным перебыванём, або і в рамках докторандьского штудія на Яґелоньскій універзітї в Кракові.