26. мая 2010 у засїдалнї Ректорату Пряшівской універзіты в Пряшові быв 9. научный семінарь карпаторусиністікы, якый як традічно приправив Інштітут русиньского языка і културы ПУ в Пряшові.
На тім семінарї притомных привітала директорка інштітуту, доц. ПгДр. Анна Плїшкова, ПгД., і наслїдно представила особу головного реферуючого, председу Русиньского културно-освітного общества А. Духновіча в Пряшові – Мґр. Гавриіла Бескида, якый потім выступив із лекціов „Русский“ дом в Пряшові: 85-річна традіція і сучасность. По прочітанім рефератї была жыва діскусія, бо тема Руського дому в Пряшові в послїднїх роках інтересую многых Русинів. Наконець, тыж як традічно, была презентована найновша книжка у сферї русиністікы, а то ПгДр. Кветославов Копоровов. Іде о книжку Іґора Буркута: „Русинство: минуле і сучасність“ (Чернівці: Видавництво „Прут“, 2009).
Тот семінарь зась підтвердив, же то была барз добра думка орґанізовати такы научны семінарї. Лем єдну мають хыбу, же скоро на вшыткы ходять тоты самы люде середнёго і старшого віку, лем даколи штуденты, котрых бы было желательно видїти там веце.