27. – 28. апріля 2010 к 60. роковинам Пряшівского собору ся одбыла у Пряшові міджінародна научна конференція під назвов Церьков в оковах тоталітного режіму. Міджі орґанізаторами конференції были тыж: Устав памяти народа в Братїславі і Інштітут памяти народа в Кракові.
Першый день конференції ся одбыв в просторах Чорного орла, то значіть на автентічнім місцю, де дошло 28. апріля 1950 к акції „Пряшівскый собор“, наслїдком чого комуністічным режім зліквідовав Ґрекокатолицьку церьков в Чеськословеньску. Другый день конференції проходиву авлї Ґрекокатолицькой теолоґічной факулты ПУ, котра была главным орґанізатором конференції. На акції взяли участь многы ґрекокатолицькы і римокатолицькы єпіскопы зо Словеньска, але і з Европы. Першый день конференції ся у вечерных годинах служыла в катедралнім храмі св. Іоанна Хрестителя свята літурґія, котру одправляв вєдно з іншыма єпіскопами пряшівскый митрополита архієпіскоп Монс. Ян Бабяк, СІ. Участників поздравив апостольскый нунцій на Словеньску, Маріо Джордана, котрый прочітав писмо од папы Бенедікта ХVІ. В нїм Святый Отець у звязи з 60. роковинами ліквідації ґрекокатолицькой церькви в Чеськословеньску і інтернації єпіскопів Павла Петра Ґойдіча, ЧСВВ, і ТгДр. Василя Гопка, ЧСВВ, оцїнив вірность ґрекокатоликів Риму і Святому Отцёви і підкреслив, же ґрекокатолици і наперек ліквідації своёй церькви, арештованю своїх єпіскопів і священиків заховали і не зрадили свою віру.
На марґо конференції треба додати, же в лекціях історіків і теолоґів не было ани в єднім припадї вказане на факт, же по ліквідації ґрекокатолицькой церькви в Чеськословеньску наслїдовала і ліквідація русиньской народности, што мало неґатівный допад на народну ідентіту Русинів, розвой їх народного і културного жывота. Мож повісти, же траґедія з пятьдесятых років ся доднесь проявлять на народнім усвідомлїню Русинів. На тот факт указав автор тых рядків у своїм діскузнім прослові на другый день конференції.