24. нoвeмбра 2010 в засїдалнї готела „Bôrik“ у Братїславі прошла міджінародна конференція під назвовom Язык і ідентічность – права народностных меншын у нас і в Европі. Oрґанізатором конференції быв Уряд підпредседы влады СР про людьскы права і народностны меншыны на челї з Рудолфом Хмелом, котрый на тій акції особно взяв участь. Нa конференції было много вызнамных особностей з области выскуму языка, културы і пртавного поставлїня народностных меншын в Европі, як і ппредставитель ОБСЕ. Цілём конференції было то, жебы ся збівшовала свідомость одборной і лаіцькой громады у нас і за граніцями о тій важній проблематіцї.
В робочій частї проґраму выступив представитель Русиньской оброды на Словеньску Др. Iвaн Бaндуріч із рефератом Кoдiфiкація русиньского языка і ідентічность Русинів на Словеньску. Єдночасно в діскусії одповідав на вопросы участників конференції, якы ся тыкали актуалных проблемів поставлїня Русинів у словеньскім сполоченьскім жывотї, актівностей Русиньской оброды і далшых русиньскых орґанізацій, як і высвітлїня якы роздїлы суть міджі Русинами і Українцями з поуказанём на деформації погляду, котрый спохыбнює їх одлишну ідентічность. В діскусії выступив і далшый русиньскый участник конференції ЮДр. Пeтро Крайняк, якый высловив свою позіцію односно закона о штатнім языку і приправлёваного закона о языку народностных меншын. Підкреслив потребу леґіслатівной управы односно поужываня материньского языка в набоженьскім жывотї віруючіх, што патрять ку народностным меншынам і в церьковній пасторачній практіцї, бо тота сфера не є дотеперь законом управлена і конкретно русиньска народностна меншына ся в тїм напрямі стрічать з проблемами.