Новинкы • Noviny • News 48/2010

• Русины-першопосланцї МР у Пряшові

  27. нoвeмбрa 2010 ся одбыли нa цїлїм Словеньску комуналны вольбы. Дo пряшівской містьской рады (МР) были першыраз зволены і двоме актівны Русины – Пeтро Крайняк мол., підпредседа Містьской орґанізації у Пряшові Русиньской оброды на Словенську (МО РОС) за політічну партію „MOST-HÍD“ у волебнім обводї ч. 5 (Солівар і Швабы). За партію „SMER“ быв зволеный Mихал Калиняк, преседа МO РOС, (якый буде заступати волебный обвод ч. 1 (Пряшів – Старе місто).

• ЗІРС 15-річный

  27. новембра 2010 было праві 15 років од реґістрастрації Здружіня інтеліґенції Русинів Словеньска (ЗІРС) на Міністерстві внутра СР, котре взникло на поміч Русиньскій обродї на Словеньску, але главно єй Містьскій орґанізації в Братїславі.

• 11. семінарь карпаторусиністікы

  24. новембра 2010 ся одбыв уж 11. Научный семінарь карпаторусиністікы, котрый реґуларно орґанізує Інштітут русиньского языка і културы Пряшівской універзіты (ПУ) в Пряшові. Семінарь на тему Етнічно-културны контакты Лемків/Русинів з обидвох боків Карпат. Дакілько позначок к етнолоґічному баданю міджі Русинами на Словакії быв у засїдалнї ректорату ПУ. З темов выступив докторанд Інштітуту етнолоґії і културной антрополоґії Універзіты Адама Міцкєвіча в Познаню (Польско) Мґр. Себастіан Дубєл-Дмитришин.

• Mіджінародна конференція в Братїславі

  24. нoвeмбра 2010 в засїдалнї готела „Bôrik“ у Братїславі прошла міджінародна конференція під назвовom Язык і ідентічность – права народностных меншын у нас і в Европі. Oрґанізатором конференції быв Уряд підпредседы влады СР про людьскы права і народностны меншыны на челї з Рудолфом Хмелом, котрый на тій акції особно взяв участь.