... в історії русиньской музичной културы

19-го мая 2014 (понеділок) о 16.00 год. у Піддукляньскім освітнім центрї у Свіднику буде одкрыта выставка музичного фонду Юрка Цимборы (1919 – 1989), бывшого хормайстра, композітора, діріґента і драматурґа тогдышнёго УНТ, фоклорісты, поета і педаґоґа як часть Фестівалу културы Русинів Словеньска. Частёв выставкы мала быти і книжка Юрко Цимбора, але комісія про русиньскы проєкты поданы на Уряд влады СР, не схвалила даный проєкт Окресной орґанізації Русиньской оброды у Свіднику. Зато хочеме чітателїв інформовати о Юркови Цимборови через новинкы по частях.

Музичный фонд Юрка Цимборы є народне богатство. Обсягом музичного фонду є тематічны ґрупых: 1. Цимбора – діпломы, 2. Цимбора – фотоґрафії і тексты, 3. Жывотопис, 4. Музичный фонд з підґрупами – маґнетофоновы награвкы, тлачовины з підґртупами: а) репертоарны зборникы, б) писомны інформації, в) публікіції о фолклорї, г) різна література, д) фотоґрафії ПУЛЬС-у, 5. Рукописы з підґрупами: а) рукописы текстовы, б) рукописы нотовы, 6. Особны документы, 7. Список співанок, 8. Список фонду, 9. Выставка фонду.

Люде ся родять і вмерають, але записана на фалаток паперя памнятка на співанку в музичнім фондї, котрый по скінчіню выставкы буде храненый в Піддукляньскій книжніцї у Свіднику, остане жрідлом познаня музичной културы нашых русиньскых предків.

У фондї є записана русиньска народна музична култура, котра іщі не была науково пробадана і публікована. Зато може быти добрым матеріалом про докторантьскы і высокошкольскы штудії. У фондї суть рукописы іщі непублікованой поетічной авторской творчости Юрка Цимборы, котры можно нелем публіковати, але і поужыти в школьскій декламації або в концертнім хоровім діятельстві.

Цінными у фондї суть і публікації о фолклорї. Нотовы партітуры співанок мож публіковати, як русиньскы методічны нотовы зборникы про орхестры і хоры. На основі тых зборників мож бы было каждорочно орґанізовати закладаня хорів дїтьскых, молодежных і дорослых, а наслїдно на то і орґанізовати школїня діріґентів. Як буде на Словеньску достаток русиньскых хорів і діріґентів, може ся орґанізовати у Свіднику цїлословеньска презентація русиньскых хоровых колектівів під назвов Цимборіяда. То бы была достойна памятка на нашого музичного великана, Свідничана – Юрка Цимбору.