Новинкы • Noviny • News 7/2010

• Юбілуючій Штефан Ладижіньскый

  7. марца 2010 ся одбуде в Братїславі концерт з нагоды 85. народенин композітора і діріґента Штефана Ладижіньского, родака з русиньского села Матісова. З позванкы на концерт ся можеме дізнати пару найвызначнїшых фактів зо жывота і професіоналной карьєры пана Ладижіньского: гуслї штудовав на музичній школї в Баньскій Бістріці в роках 1933 – 1938. Пізнїше быв членом школьского орхестра на Руській ґімназії у Пряшові, де штудовав, в роцї 1943 ся став діріґентом співацького кружка на ІІ. Штатній ґімназії в Братїславі. Од того часу ся Ш. Ладижіньскый став сучастёв орхестралного жывота на цалу свою професіоналну карьєру, ці то уж як діріґент, або умелецькый ведучій, ці шефдраматурґ (быв ведучім ПУЛЗ-у у Пряшові і многых далшых умелецькых ансамлїв бі колектівів у Празї і Братїславі, закладатель, формователь і першый директор братїславского штудіа „С“ (пізнїше штудіо „Л+С“), заложыв дїтьскый колектів Русовскы внучата....). Придаваме іщі, же Штефан Ладижіньскый є актівным і в русинькім возроднім русї, єден період быв докінця і председом Русиньской оброды на Словеньску. Ёго актівіты заміряны на Русинів в послїднїм часї запрезентовав приправлёванов публікаціов русиньскых народных співанок, котра бы мала скоро выйти.

• Вызначный фізік-Русин – проф. Д. Ільковіч

  18. януара 2010 минуло 103 рокы од народжіня вызначного научного працовника світового мена і педаґоґа русиньского походжіня – Діонізія Ільковіча. Народив ся у Шарішскім Щавнику, окрес Свідник, у родинї ґрекокатолицького священика. По матурї в Пряшові одышов до Прагы штудовати математіку, фізіку і хемію на Універзіту Карлову, де ся барз добрї учів і зато почас штудій быв а по їх абсолвованю в роцї 1930 зістав на універзітї асістентом знамого науковця Ярослава Гейровского, обявителя складной методы під назвов полароґрафія выужываюча електроаналізу на встановлїня зложіня латкы-рідины. За тот обяв Гейровскый в р. 1959 дістав Нобелову цїну. А на тім успіху мав немалый подїл праві молодый Д. Ільковіч.