10. апріля 2014 у Пряшoвi умер у віку 90 років жывота владыка Іоан Гірка, емерітный пряшівскый ґрекокатолицькый єпарха.

Іоан Гірка народив ся в селї Абрановцї, Пряшівского окресу, 16. новембра 1923 р. Штудовав на Высокій школі богословскій в Пряшові, пізнїше одыйшов на штудії на Теолоґічну факулту Карловой універзіты в Празї. За священика быв высвяченый блаженым владыком Василём (Гопком) 31. юна 1959 р. В роках 1949 – 1950 быв капланом в парафії Лютина. В 1950 роцї по насилній ліквідації Ґрекокатолицькой церькви не є в пасторації і робить як робітник на ставбі в Тренчінї. В 1952 роцї є одсудженый на три рокы арешту. По амнестії робив як робітник в Брезнї. В роцї 1955 є знова одсудженый Найвысшым судом в Празї на два і пів рока арешту і примусовы роботы в угольных банях в Ртынї і Підкрконошу (Чехія). На свободу ся дістав в роцї 1958 і зачав робити як робітник в Брезнї. По обнові Ґрекокатолицькой церькви в 1968 роцї ся ставать парохом і деканом в Пряшові. В тім самім роцї є менованый папом Павлом VI. за адміністратора Ґрекокатолицькой пряшівской єпархії. Державну згоду на діяня в тій функції здобыв аж в роцї 1969. В 1978 р. є менованый за папского прелата. За ґрекокатолицького єпарху є менованый аж по револуції, 21. децембра 1989 року. Єпіскопскы свячіня дістав 17. фебруара 1990 од Йозефа кардінала Томка в Пряшові. Дня 11. децембра 2002 р. ся став емерітным єпіскопом і жыв дале в Пряшові-Соліварї.
Вічная ёму память!