11. фебруара (віторок) 2014 у Высокошкольскім ареалї Пряшівской універзіты на ул. 17. новембра ч. 1 в Пряшові ся одбуде 2. річник Дня отвореных дверей. Є то акція пропаґачного характеру, яку ПУ орґанізує цїлено якраз в тім в часї, коли тогорічны абсолвенты середнїх школ вырїшують о своїй далшій перспектіві і выберають собі універзіту, на якій будуть выбраный одбор штудовати. До той акції цїлоуніверзітного характеру ся запоюють вшыткы факулты і інштітуты Пряшівской універзіты, враховано Інштітуту русиньского языка і културы.

На День отвореных дверей ся веджіня Пряшівской універзіты старостливо приправлёвало довшый час. На челї з проректором ПУ про освіту проф. ПгДр. Міланом Портїком, ПгД., реґуларно засїдав приправный выбор акції, зложеный з представителїв Ректорату ПУ, Уніпоцентра, окремых факулт і інштітутів цїлоуніверзітного характеру. Выбор робив над сценаром і режіёв цїлоденного проґраму, цїлём якого буде в першім рядї якнайкомплекснїше представити Пряшівску універзіту своїм потенціалным штудентам і понукнути їм – посередництвом презентацій, діскузій з ректором ПУ проф. РНДр. Рене Матловічом, ПгД., представителями восьмох факулт і окремых інштітутів – можности штудій на ПУ, але таксамо і можности про мімошкольскы актівіты штудентів ПУ. Віриме, же посередництвом той акції Пряшівска універзіта докаже ословити якнайвеце молодых людей, котры на далшых пять років звяжуть свій жывот з Пряшовом, a Пряшівска універзіта ся про них стане alma mater.
А. ПЛЇШКОВА, фоткы авторкы