8. фебруара 2014 в Будапештї ся одбыло святкованя 150 років народжіня вызначного мадярьского ученого, історіка і етноґрафа, академіка Мадярьской академії наук – Антонія Годинкы (1864 – 1946), Русина родом зо села Ладомирів (окр. Снина). К тому юбілею Цїлоштатне общество русиньской інтеліґенції А. Годинкы з центром в Будапештї приправило святочну академію, частёв котрой каждый рік є ай выголошіня лавреатів Премії А. Годинкы. До тогорічного списку номінованых будапештьске общество по штирёх роках загорнуло знову і представителя Русинів зо Словакії (позн. ред.: в р. 2010 тото оцїнїня здобыв о. ТгЛіц. Франтїшек Крайняк за вклад до розвитку русиньской пасторації). В тім роцї номінацію здобыла доц. ПгДр. Анна Плїшкова, ПгД., в сучасности директорка Інштітуту русиньского языка і културы Пряшівской універзіты в Пряшові, котра в области русиньской културы робить од року 1987 a в сферї языкознательства од року 1998. Пaмятну медайлу А. Годинкы здобыла за вызначный вклад до розвоя русиньского языка і културы. Ґратулуєме.