12. фебруара 2014 ся на Пряшівскій універзітї одбыв День отвореных дверей, у рамках котрого і наш Інштітут русиньского языка і културы представлёвав потенціалным штудентам можности штудій акредітованых форм штудійных проґрамів. В тот день універзіту навщівило доста много штудентів середнїх школ, котры ся пришли інформовати о можностях штудія обще, ці конкретно на выбраны проґрамы, де сі мали можность пояснити рїчі, котры їм не цїлком были зрозумілы.

Коло пропаґачного Інштітуту штуденты русиністікы вєдно із ПгДр. Кветославов Копоровов, ПгД., молодым людём з інтересом о штудіюм на ПУ пояснёвали штудійный проґрам учітельства русиньского языка акредітованого в двох ступнях штудія в комбінації з 23 штудійныма одборами на факултах ПУ. Приближыли дїятельность інштітуту, проґрамы, на котрых бере участь, як і планы а цїлї інштітуту до будучности. Таксамо представлёвали можность далшого продовжованя штудія на єдинім на світї акредітованім докторандьскім штудію русиністікы і перспектівы далшого уплатнїня штудентів. Інтерес о можности штудія на ПУ мали і школьскы порадцёве, котры на єднотливых становіщах наберали штонайвеце інформацій о можности штудія, профілї абсолвента і ёго наслїдной перспектівы уплатнїня, котры бы могли передавати дале штудентам своїх школ, і якымесь способом їм помочі з выбером і накеровати їх на штось, што бы ся їм придало, подля їх заміряня і інтересів. В рамках презентації ІРЯК і штудія на ним была приготовлена выставка русиньскоязычных книжных і періодічных выдань. Добру атмосферу міджі молодыма штудентами укрїповав допроводный проґрам успішных умелецькых колектівів ПУ, котрый сьме могли через день цїлком добрї выслухати, дякуючі позіції нашого місця презентації.

Правї такы акції, де ся прямо контактуєме з людми, нам дають простор про саморефлексію і наслїдне доповнёваня інформації, о котры быв інтерес, а може і іншпірованём ся і од другых катедер. Надїяме ся, же День отвореных дверей сповнив цїль, котрый мав, і в далшім академічнім роцї увидить універзіта, а в нашім напрямі першорядо Інштітут русиньского языка і културы, позітівны выслїдкы з той подїї.