Новинкы • Noviny • News 36/2010

• Вмер русиньскый поет Н. Гозда

  3. септембра 2010 добило сердце русиньского народного поета – Николая ГВОЗДЫ, котрый быв похованй у родній Ладомировій (окрес Свідник) 5. септембра 2010. Перестала грати ёго поетічна ліра...

• Першый рік на постї методіка русиньского языка

  2. септембра 2010 зачав новый школьскый рік 2010/2011 а при тій нагодї сьме зробили розговор із методіком русиньского языка і літературы Мґр. Мареком ҐАЁМ. М. Ґай із Міджілаборець є єдным із першых абсолвентів высокошкольского штудійного проґраму Учітельство про І. ступінь основной школы з росшыреным навчанём русиньского языка на Пряшівскій універзітї. Од скінчіня высокой школы (2002) є учітелём Основной школы М. Сопыры в Радванї над Лабірцём (окр. Міджілабірцї), на якій вдяка нёму ся поступно завело навчаня русиньского языка, а то нелем на першім, але і на другім ступню ОШ. Тыж вдяка нёму інтерес о даный предмет на радваньскій школї має ступаючій тренд, окрем того школярї той школы ся стали актівныма дописователями нелем новоствореного школьского часопису Русначок, але і традічной молодежной прилогы Народных новинок – Русалкы. Як кваліфікованый учітель русиньского языка із вісемрічнов педаґоґічнов практіков, а уж і автор русиньскых учебників, од зачатку минулого школьского року 2009/2010 М. Ґай ся став методіком того предмету Методічно-педаґоґічного центра у Пряшові. В тых днях минув першый рік ёго дїятельства на тім постї.

• Говерла – русиньска!

  13. – 15. авґуста 2010 ся реалізовала єдна інтересантна акція русинськых актівістів і молоджавы під геслом «Карпатьськы Русины – єден нероздїлній народ!» Міджінародна русиньска ґрупа, котра представлять дакілько русиньскых общественных орґанізацій і сімпатізантів русиньского двиганя, выступила на найвысшу гору Підкарпатьской Руси – Говерлу (2060 м ) і вынесла на верьх горы русиньску заставу і заставу Европской унії. Участници акції были з Підкарпатьской Руси ( Україны), Словакії, США і Нїмецька.