Новинкы • Noviny • News 8/2013

• Славностне одкрытя памятной таблы

  (Буде свято Русинів у Братїславі.)
  Братїславскы Русины у сполупраці з Русиньсков обродoв на Словеньску, Інштітутом русиньского языка і културы Пряшівской універзіты, Здружіням інтеліґенції Русинів Словеньска і молоды.Русины позывають Вас на Славностне одкрытя памятной таблы на будові інтернату Дружба, де перед 18 роками ся одбыв святочный акт кодіфікації русиньского списовного языка на Словеньску. Тото святочне одкрытя буде 23. фебруара 2013 (субота) o 14:00 год., ул. Ботаніцка 25 в Братїславі, при мостї Лафранконі.

• Выпровадили на путь памятну таблу

  (18 років кодіфікації русиньского языка.)
  З ініціатівы Мґр. Петра Крайняка, робітника Уряду уповномоченого влады СР про народностны меншыны Уряду влады СР, 4. фебруара 2013 на Інштітутї русиньского языка і културы Пряшівской універзіты ся одбыла сімболічна неформална стрїча, цїлём якой было припомянути собі юбілей – 18 років од кодіфікації русиньского языка на Словеньску. Ініціатіва была звязана з приправов святочного акту напланованого в Братїславі на 23. фебруара 2013, а то з одкрытём памятной таблы на будові інтернату Дружба, в котрім 27. януара 1995 была за участи вызначных представителїв домашнїх і загранічных народностных, културных, освітнїх і церьковных орґанізацій і інштітуцій Русинів, як і представителїв културно-сполоченьского, освітнёго і політічного жывота СР святочно выголошена кодіфікація русиньского языка на Словеньску.

• Інтересна презентація карпаторусиністікы

  (День отвореных дверей на Пряшівскій універзітї.)
  14. фебруара 2013 у Высокошкольскім ареалї (ВША) Пряшівской універзіты в Пряшові, на ул. 17. новембра ч. 1 ся одбыла цїлоуніверзітна акція – День отвореных дверей. Велика презентачна і пропаґачна акція дала простор каждій факултї ці інштітуту на пропаґацію свого штудійного проґраму. До акції ся запоїв тыж Інштітут русиньского языка і културы ПУ – презентаціов выслїдків роботы своїх робітників і обидвох штудійных проґрамів. Штуденты середнїх школ, в главно тогорічны матуранты припутовали до Пряшова передовшыткым зо школ северовыходного Словеньска – з окресів компактно заселеных Русинами, зато ся приставлёвали при станку, котрый вдяка великым рекламным банерам такой на зачатку вестібулу сіґналізовав заміряня роботы інштітуту на Русинів і карпаторусиністіку.

• Studium Carpato-Ruthenorum 2012

  (Вступне слово едіторкы недавно выйдженого зборника під таков назвов.)
  Семінары карпаторусиністікы здобыли певне місце в презентації научных бадань шпеціалістів з розлічных областей жывота карпатьскых Русинів. Кідь бы сьме представили спектрум выступаючіх на четвертім річнику, опроти попереднёму быв збогаченый нелем о новы выслїдкы научных бадань, але ай о новы особности, котры на семінарі выступили з выслїдками своїх довгорічных бадань в дотеперь непознаных, або лем барз зошырока познаных областей выскуму карпаторусиністікы як научной дісціпліны.