• • •
Internetové noviny

Uverejnené názory dopisovateľov nemusia byť totožné s názormi redakcie.

Опублікованы погляды дописователїв не мусять быти згодны з поглядами редакції.

Новинкы • Noviny • News 15/2014

  • Пoзваня на 26. семінар карпаторусиністікы

    Iштітут русиньского языка і културы Пряшівской універзіты у Пряшові Вас позывать на 26. научный семінар карпаторусиністікы, якый буде 9. апріля (середа) 2014 од 10. 00 год. в засїдалнї Consilium maius (2. шток, ч. 328) Ректорату Пряшівской універзіты, ул. 17. новембра ч. 15. З лекціов на тему Оптація Чехів, Словаків і Українцїв (Русинів) у роках 1946-1947 выступить доц. Др. Світлана Шульга, к. н. з Катедры світовой історії Выходоевропской народной універзіты Лесї Українкы в Луцку (Україна). В проґрамі семінара буде презентація найновшых выдань з карпаторусиністікы.

  • Проґрам лїтнёй школы

    Од 15. юна до 5. юла 2014 на Пряшівскій універзітї у Пряшові (Словакія) одбуде ся 5. річник Міджінародной лїтнёй школы русиньского языка і културы – Studium Carpato-Ruthenorum 2014. Почас лїтнёй школы, окрем навчаня русиньского языка, історії і етноґрафії у русиньскім і анґліцькім языку, пройде много доповнюючіх акцій. Єднов iз них буде участь на 60. Фестівалї културы Русинів у Свіднику, котров ся зачне лїтня школa у недїлю 15. 6. 2014. А в понеділок 16. 6. 2014 зачне уж навчаня, а то лекціёв русиньской історії по анґліцькы проф. Др. Павла Роберта Маґочія з Торонта а по русиньскы Мґр. Валерія Падяка, к. н. із Ужгороду.

  • Першыраз в Мадярьску!

    Народностны громады Мадярьска того року першыраз мають можность выберать пославцїв до мадярьского парламенту, также і Цїлоштатна русиньска самосправа (вєдно зо самосправов Русинів у Сербії суть єдиныма у світї), могла выбрати своїх кандідатів до будучіх волеб. Подля § 9 Закона ку сформованю народностного списку треба рекомендації мінімално 1 % волічів із вшыткых зареґістрованых волебных списків, або максімум 1 500 особ.

  • Чабиньскый студник 2014

    Дня 18. марца 2014 ся одбыв в Основнїй школї з русиньскым навчалным языком в Чабинах конкурз під назвов Чабиньскый студник. Ішло о конкурз в декламованю творів нашых русиньскых писателїв. Тот конкурз ся став у нашій школї традіціов а того року уж ішло о четвертый річник.