Народностны громады Мадярьска того року першыраз мають можность выберать пославцїв до мадярьского парламенту, также і Цїлоштатна русиньска самосправа (вєдно зо самосправов Русинів у Сербії суть єдиныма у світї), могла выбрати своїх кандідатів до будучіх волеб. Подля § 9 Закона ку сформованю народностного списку треба рекомендації мінімално 1 % волічів із вшыткых зареґістрованых волебных списків, або максімум 1 500 особ.

Міджі кандідатів народносного списку може быти записаный тот воліч, котрый є зареґістрованый у волебнім списку даной народности (в нашім припадї Русинів Мадярьска). До народностного списку мусить быти записано найменше три кандідаты. Дві або веце народностных самосправ не мають право сформовати сполочный список. Подля абзацїв 1 і 2 § 18: „Народность, котра сформує народностный список, але не здобуде подля нёго мандат, буде представлёвати ся у парламентї як народностный посланець. Народностным посланцём стає тот кандідат, котрый в народностнім списку є на першім місцї“.

На засїданю 15. фебруара 2014 Цїлоштатна русиньска самосправа (ЦРС) сформовала свій властный народностный список кандідатів на посланцїв у парламентных вольбах у 2014 роцї: В. Ґіріц, Я. Кожняньскый, М. Смоларне Надь, С. Лявинець, Я. Соноцкі, Е. Фекете, Й. Чеґіль, Л. Мудра, М. Варґа, Ф. Тудлік, Р. Андрейчак, М. Семан, Б. Мінёвцкі, Ґ. Варґа і Д. Молнар. В тот самый день ЦРС офіціално зачала волебну кампань. Подля фактів із 5. марца 2014 до русиньского народностного списку ся зареґістровало 643 особ, із котрых у парламентных вольбах список ЦРС ся приголосило волити 424 волічів.

Дякуєме Русинам Мадярьска за проявлену актівность і надієме ся, же подобный ентузіазм проявлять і у вольбах! Русины Мадярьска, дайте свій голос народностному списку Цїлодержавной русиньской самосправы у Мадярьску!