Новинкы • Noviny • News 17/2009

• Творча осінь присвячена Б. Антонічови

  17. – 18. октобра 2009 у Ґоліцях в Польску одбыв ся 17. річник Лемківской творчой осени, котрый быв присвяченый 100. рокам од народжіня Богдана Іґоря Антоніча. Акцію зорґанізовало Стоварішынь Лемків і Стоварішыня „Руська Бурса“ в Ґорліцях.

• На восьмох – сімсто

  17. октобра 2009 у Театрї Йонаша Заборьского у Пряшові быв ґалаконцерт 8. річника Співів мого роду, ґалаконцерт найлїпшых інтерпретів русиньскых народных співанок із тогорічных реґіоналных кол того конкурзу і попереднїх лавтеатів. Тоты, што сьте не были на тім ґалаконцертї, не можете знати, што значіть тот загадный тітулок. То проста, але много говоряча штатістіка: за вісем років екзістенції акції Співы мого роду на різных сценах прозвучало сімсто русиньскых народных співанок (!) Также є чім ся похвалити нам, Русинам.

• Успішна акредітація і новы комбінації

  В першій половинї октобра 2009 сьме ся дізнали добру вістку, же быв акредітованый маґістерсьскый штудійный проґрам русиньскый язык і література (!)
  Мусиме повісти, же процес комплексной акредітації Пряшівской універзіты (ПУ) засягнув каждого, хто є запоєный до реалізації будь-якого штудійного проґраму в рамках універзіты, не вынимаючі Інштітут русиньского языка і културы ПУ. До комплексной акредітації інштітут приготовав проєкты двох штудійных проґрамів русиньскый язык і література в комбінації предметів: іновованого бакаларьского і нового маґістерьского, обидва в рамках штудійного одбору учітельство академічных предметів. Якраз в тых днях МШ СР опубліковало выслїдкы комплексной акредітації ПУ, а мы з потїшінём можеме сконштатовати, же на реалізацію обидвох нами приготованых проєктів ПУ здобыла акредітацію (!!!)

• Престіжне оцїнїня

  25. септембра 2009 у Нітрї дістав престіжну театралну цїну ДОШКЫ 2009 герець русиньского Тетру Александра Духновіча в Пртяшові – Евґеній Либезнюк (!), а то за роль Лопахіна в грї А. П. Чехова Вышнёвый сад у Театрї Андрея Баґара в Нїтрї.