Новинкы • Noviny • News 37/2010

• 11. Фолклорне свято в Хмелёвій

  11. септембра 2010 село Хмелёва, Русиньска оброда на Словеньску, Здружіня інтеліґенції Русинів Словеньска зорґанізовали Хмелївскы днї хлїба в рамках 11. Фоклорного свята і Днїв русиньскых традіцій.

• Партія Наш край – зареґістрована

  2. септембра 2010 на Міністерстві внутра СР в Братїславі была записана до реґістра партій нова партія Наш край. Подля слов єй ініціаторів головныма причінами про зроджіня того політічного субєкту є, же політічны партії, котры мають цілословеньску уровень, не понукають проґрам про розвиток северовыходного Словеньска і не хранять народностны інтересы єй жытелїв.

• Выробкы Я. Бобка обдивляв і презідент СР

  27. і 28. авґуста 2010 у Спішскій Новій Всі была третя стріча баньскых міст і сіл Словеньска, але і 15. річник Торгу народных ремесел, на котрім ся представили народны майстры із Словеньска, Польска і Чеськой републікы. Проходив ту і День міста, в рамках якого представили ся умелцї і умелецькы колектівы, заінтересовав алеґорічный віз, а позерателї могли обдивляти і короткы сценкы з історії Спіськой Новой Всі, як і выслїдкы роботы народных майстрів.

• Ґранты про народности будуть богатшы

  27. авґуста 2010 в Кошіцях ся стрітив підпредседа влады СР про людьскы права і меншыны – Рудолф Хмел із штирёма представителями народностных меншын на неофіціалнім рокованю. Русинів на тім рокованю заступав председа Русиньской оброды на Словеньску – Владимір Противняк.