„Može by-m vas všytkych pozvav rozvažatí nad takym obraznym príkladom”. Takyma slovamí začav svoju propoviď o. Jaroslav Popovec', predseda Obščestva sv. Joana Krestíteľa v deň desjať ročňici spomjanutoho Obščestva (1. marca 2014) i prodovžav: „Jedna šyroko rozkonarena rodína zasídať ku stolu. Na stoľi je prísterte bile polotno, na kotrim sja nachodíť lem jeden maleňkyj chľib. Každyj člen rodíny dobri znať, že tot chľib ne vystarčiť pro všytkych, že ne zasytíť cilu rodínu. Otec' choc' rozdumeje, že svoju častku komus' dasť iz ďitej, no ne znať kotromu, žeby sja midži sobov ne spričalí. Zato každomu iz toho chľiba davať maleňku častku zo slovamí: - Budu sja namahatí v dalšy dňi robítí tak, žeby-m čim skorše príňis na sťil ne lem dostatok chľiba, no i što-s' na vece, žeby rodína ne holodovala.- A tak mozolíť, zrikať sja oddychu, zaznavať potupu od druhych, nuždy, trapľiňa i bidy, ne smotríť na ťažoby od ver'chností, no bere odpovidňisť za cilu rodínu. I spravdy za dajakyj čas nabude všytko potribne pro rodínu. A choc' ne žyje rodína v roskošach, ne zaznavať ťiľko bidy z nedostatku jidla. Na stoľi už ne je lem chľib, no i inšy smačny jidla...“

Može takym, pro nas zrozumilym obraznym príkladom by jem vykreslív doteper' desjať ročnu dorohu našoho Obščestva. I my na počatku roku 2004 zasilí ku prístertomu bilomu stolu, na kotrim chybilo každe jedno duchovne jidlo. Byv tu lem jeden malyj chľib, kotrym bylí Apostoly i Jevanhelija na neďiľi i svjata z imprimaturom jepiskopa Joana Hirky, kotre chosnovalo paru svjaščeníkiv. Aní o našoho operedníka my sja ne mohlí opertí, žeby nam pomih dajakym duchovnym jidlom – časopísom abo kalendarjom pro našych grekokatolíkiv Rusíňiv, bo v rokach 1862-1874 ne vyšla od OSJK aní jedlna publikacija, ci časopís.

Proto obnovlene Obščestvo sv. Joana Krestíteľa vzjalo zodpovidnosť za totu šyroko roskonarenu rodínu našych rusíňskych virníkiv a namahalo sja za tych desjať rokiv zasytítí jich smačnym duchovnym jidlom, od maleňkych až po doroslych. Na stoľi za kurtyj čas bylí odrazu Katechizmy pro rusíňsky ďití, Molítveníky svjatoho ružancja. Od roku 2004 začav každy tri misjaci vychodítí časopís Artos, každym rokom Grekokatolíc'kyj rusíňskyj kalendar'. Onedovho virníky mohlí sja molítí i spivatí v svojim materíňskim jazyku Krestnu dorohu, Akafist ku Christovym strasťam, Toržestvennu odpravu Isusovoj molítvy, Akafist ku blaženomu Pavloví Gojďičoví, Pohrib, Parastas i Duchovny pisňi. U svojich cer'kvach i na dakotrych odpustovych miscjach, jak Krasnyj Brid, Čirč, abo Bukova hirka, mohlí čutí v rusínčiňi pros'by v jektenijach Rcem vsi... za sebe, za chvorych, podorožňich i inšy. Doma malí možlivosť čitatí Bože slovo iz Tetrajevanhelija. Od minuloho 2013 r. rodíčí majuť pravo i povinnosť žadatí svojoho otcja duchovnoho, žeby jich narodženy ďitočky pokrestív i miropomazav rusíňskym obrjadom. Našy christíjaňsky molody pary naj prí svojim vinčaňu žadajuť prekrasnu odpravu Tajny manželstva zo schvalenoho rusíňskoho Trebníka!

Choc' by s'me mohlí podumatí i povístí: Sťil sja zapovnív! No Obščestvo išči vse vidíť na ním misce pro dalše smačne jidlo v podobi Molítveníka i perekladu Služby Božoj sv. Joana Zlatoustoho v rusíňskim jazyku. Toto všytko z jedínym ciľom, lem žeby bylo dosyta duchovnoho jidla pro každoho Obščestvo sv. Joana Krestíteľa mať dnes už vyšše 600 čleňiv. Dňa 1. marca toho roku z nahody desjať ročnici dijaňa obnovlenoho Obščestva sv. Joana Krestíteľa byla v Midžilabircjach služena ďakovna Služba Boža. Na Službi Božij bylo učastnych 11 svjaščeníkiv i ponad 150 čleňiv i simpatizanťiv Obščestva. Holovnym služiteľom byv o. Jaroslav Popovec', predseda OSJK. Pered Službov Božov členky choru M. Bradača z Kamjunky zaspivalí molítvu Otčenaš v rusíňskij verziji a Stanka Jasíkova z Voľici zadeklamovala virš Josífa Kudzeja napísanyj z toj nahody. Po Službi Božij zaspivalí i zadeklamovalí škoľari Osnovnoj školy Anatolija Kralíckoho z Čabín. Na ďakovnu Službu Božu Obščestvo sv. Joana Krestíteľa pozvalo i našoho archijepiskopa i pomičnoho jepiskopa, no nažaľ obidvomi opravdalí sja zo svojoj neučastí.

Obščestvo choče i na dale pomahatí jevanhelizovatí rusíňskyj narod i šyrítí duch Pavloviča, Duchnoviča i blaženych našych jepiskopiv Pavla Gojďiča i Vasilíja Hopku.