Написав єм книжку о Юркови Цимборови і о ёго музичнім фондї. Окресна орґанізація Русиньской оброды у Свіднику подала проєкт на выданя той книжкы, а на то пожадала і фінанції з ґрантового проґраму Уряду влады СР – Проґрам култура народностных меншын 2014. Книжка мала быти частёв выставкы музичного фонду Ю. Цимборы у Свіднику. Але „одборна“ комісія про русиньску народностну меншыну при Урядї влады СР тот проєкт такой на зачатку вышмарила з евіденції і не підпорила го.

Чітали сьме в Народных новинках, же і Ольґа Глосікова была членков той комісії. Нажаль, же такы особы, котры собі не цїнять найвызнамнїшы русиньскы културны особности і ани ся не намагають о захрану русиньской културной дїдовизны, суть менованы за членів русиньской комісії на посуджованя предложеных проєктів і пропонованя фінанчных дотацій на окремы културны актівности.

Де ся подїли русиньскы дотації на 2014 рік, кідь были про Русинів штатом звышены? Выдаваня новинок і інформованя верейности в материньскім русиньскім языку є наша народностна возродна пріоріта, а історічно найстаршы русиньскы періодічны выданя на Словеньску – Народні новинкы і Русин дістали іщі менше пінязей, як минулого року. А на вызнамный русинькый музичный фонд Юрка Цимборы ся не ушло ани евро. Як є то можне, же дахто в комісії на оцїнёваня русиньскых проєктів так отворено ся снажыть о ліквідацію найстаршой русинской пресы ці о віроломну ліквідацію проб захраны русиньскых збірковых фондів? Де є даякый решпект ку історічному русиньству у членів комісії? То не є робота о камаратстві i авантурізмі, але то є о сполоченьскій одповідности і серёзности. Тота сітуація ся на другый рік нам може повторити, як дашто не зробиме на выяснїня пріоріт при дїльбі пінязей. Я пропоную, жебы сьме в менї Округлого стола Русинів Словеньска попросили о поміч і раду од Петра Штефаняка, автора математічного взорця на дїлїня штатной дотації про народностны меншыны. Най запропонує про Русинів взорець, подля котрого буде русиньска комісія роздїлёвати штатну додтацію на русиньскы проєкты. Ёго пропозіція най бы была дана на припомінкованя Округлому столу Русинів Словеньска (ОСРС), а потім най бы быв решпектованый каждым членом русиньской комісії на оцїнёваня русиньскых проєктів. Главно – председом той комісії. То бы быв може найоптімалнїшый приступ ку спокойности нас вшыткых односно штатной фіначной підпоры. За роботу над взорцом мала бы быти дана Штефанякови і даяка фінанчна одміна. Треба о тым вырїшыти на ОСРС у Свіднику.