Основна школа з русиньскым навчальным языком у Чабинах зорґанізовала 13. фебруара 2014 про своїх школярів День з Анатоліём Кралицькым.

Іде уж о четвертый річник той акції, котра ся на нашій школї стала звычаём. Того року быв тот день о дашто вызначнїшый, бо в тот день сьме собі припомянули 180 років од народжіня Анатолія Каралицького, котрый быв родаком з Чабин, як і 120 років од ёго смерти. З той нагоды ся у чабиньскій ґрекокатолицькій церькви служыла панахіда за А. Кралицькым, котру служыв о. Мілан Ясик. Школярї основной школы собі цїлый день припоминали розмаїты інтересности зо жывота А. Кралицького і вшыткы вєдно різныма вытварныма техніками творили ілустрації до творів того вызначного родака, котры собі в тот день перечітали, як і ёго портреты, жебы собі так припомянули і то, як вызерав. Окрем того сьме собі вытворили і лампіоны, котры сьме выхосновали на лампіоновім походї, якым сьме закінчили цїлоденны актівіты.

Перед самым походом сьме собі задекламовали стишок о жывотї А. Кралицького, якый нам з той нагоды написав Осиф Кудзей. По тім стишку сьме ішли в світлї лампіонїв селом аж ку Памятнику А. Кралицькому у Вышнїх Чабинах, де сьме собі вєдно заспівали дакілько співанок а в часї їх співаня сьме выпустили лампіон щастя.