В день святкованя 10-річного юбілею Общества св. Йоана Крестителя (1. марца 2014) хочу Вам, пане председо Общества – о. Мґр. Ярославе ПОПОВЦЮ, вшыткым членам выбору Общества і вшыткым ёго членам зажелати главно міцне здравя і родинне щастя, без чого бы не было мож розивати таку успішну роботу, як робить Общество у сферї захованя русиньского языка вообще, а в пасторації окреме.

Зато хочу высловити велике подякованя нелем од себе, але од вшыткых членів двох русиньскых орґанізацій – Академії русиньской културы в Словеньскій републіцї і Русина і Народных новинок – на челї котрых стою. Высоко цїниме Ваш принос до розвоя пасторації в русиньскім языку а через ню тыж до розвоя русиньского языка, главно вдяка перекладам церьковной літературы з церьковнославяньского до русиньского літературного языка. Высоко цїниме тыж Вашу културно-набоженьску роботу з молодыма людми, з котрых і вдяка Вам выростають народно свідомы люде – з почливостёв к родному языку, културї і церькви. Своёв роботов сьте досягли найвызначнїшый вплив на выхову честных і свідомых ґрекокатоликів-Русинів і їх народно свідомых священиків. Вдяка Вашій роботї на благо русиньского народа і ґрекокатолицькой церькви sui iuris, Русины собі у бівшій мірї усвідомлюють свою народну і набоженьску достойность, што ясно декларовали і в послїднїх двох списованях людей.

К юбілею Общества св. Йоана Крестителя Вам хочеме поґратуловати і зажелати іщі много далшых, не менше успішных років дїятельства на благо Русинів і на благо русиньскых ґрекокатоликів.